Alvara lífsins

Allt tekur enda líka löng jólafrí og nú er fyrsti skóladagurinn liðinn.  Ferðalagið í gær gekk vel, flugið fínt, lestarferðin ágæt og strætóferðin stutt og góð.  Ég náði í afganginn af afgöngunum í kvöldmatnum og heilsaði uppá gamlar og nýjar skólasystur. 

Ég er í holli 2 með eintómum dönum sem er bara fínt þá freistast maður ekki til að tala íslensku.  Við byrjuðum í dag í fatasaum og það er augljóst að ég verð að reikna með fáeinum dögum til að komast í gang.  Á morgun er valfag og nú má velja á milli tegning og tilbehør.  Ætli ég velji ekki tilbehør það hljómar spennandi, veit meira um það síðar.

Fór í fínan göngutúr niður að firði í roki og smá rigningu, hér er allt á floti alls staðar og vond veðurspá.  Það var merkilegt að koma úr frostinu á fróni og hingað í 7 stiga hita.  Það sást vel úr lestinni hvað akrar og engi eru blaut, heilu tjarnirnar, minnti kannski helst á hrísgrjónaakra annarrs staðar á hnettinum.  Svo ekki sé talað um skrúðgræn túnin.  Mér er sagt að þessi hlýindi og bleyta séu mjög óvanaleg á þessum árstíma. 

Athugasemdir

[Hjörtur 19.1.2007 kl. 09:00]

Það er búið að snjóa helling í viðbót, síðan þú  fórst :)

Kv: Þinn sonur